ޤައުމީ ލީޑަރުންގެ ކިބައިން ފެންނަށްޖެހޭ ރިވެތި ސިފަތައް.

ކޮންމެ ތަނެއްގައިވެސް އެންމެ އިސްކޮށްތިބޭ ބަޔަކީ ދެން ތިބޭ މީހުން ނަމޫނާއަކަށް ބަލާނެ މީހުންނެވެ. ސްކޫލެއްނަމަ އެސްކޫލެއްގެ ޕްރިފެކްޓުންނަކީ ދެން ތިބޭ ކުދިން އަބަދުވެސް ނަމޫނާއަކަށް ބަލާނެ ކުދިންނެވެ. އެގޮތުން ޤައުމެއްގަ ނަމަ ޤައުމީ ލީޑަރުންނަކީ ޤައުމުގެ ރައްޔިތުން ނަމޫނާއަކަށް ނަގާނެ މީހުންނެވެ. ނަމަވެސް އަޅުގަނޑުމެން އެންމެން ނަމޫނާދައްކުވައިދޭން ތިބި ތިބި ޤައުމީ ލީޑަރުންގެ ކިބައިން މިފެންނަމުން ދަނީ އަޅުގަނޑުމެން ދެކެން ބޭނުންވާފަދަ ސިފަތަކެއް ނޫނެވެ. އެފަދަ ބޭފުޅުންނަކީ، ތެދުވެރި ސުލްޙަމަސަލަސްކަން ދަމަހައްޓާ އެއްބަޔަކު އަނެއްބަޔަކަށްއެހީތެރިވާ އަދިހަމައެހެންމެ ދީނަށް ހުރުމަތްތެރިކޮށް ހިތާ ބަޔަކަށް ވާންޖެހެއެވެ.

ޤައުމީ ލީޑަރުންގެ ކިބައިން ފެންނަށްޖެހޭ ރިވެތި ސިފަތަކުގެ ތެރެއިން އެއްސިފައަކީތެދުވެރިކަމެވެ.މިހާރުގެ ޤައުމީ ލީޑަރުންނަކީ ތެދުވެރިކަން ނެތް ބައެއްކަން ދަނީ ސާބިތުވަމުންނެވެ. އެއީ މުޅި ދުނިޔޭގެ ކުރިމަތީ ޓީވީ ޗެނަލަތަކަށް އަރާ އެފަދަ ބޭފުޅުން ދައްކާ ވާހަކަ ތަކުގެ ސަބަބުންނެވެ. އެއްފަހަރު ދައްކާ ވާހަކައެއް ދެވަނަ ފަހަރަށް އެހެން ގޮތަކަށް ބަދަލުކޮށްލައިގެން ދައްކާތަން މިހާރުދަނީ ވަރަށް ގިނައިން ފެންނަމުންނެވެ. މިސާލަކަށްއެއްފަހަރު މިވެނިކަމެއް ކުރީމޭ ބުނެފައި ދެވަނަ ފަހަރު އެއީނުކުރާ، އަދި ނުވެސް ބުނާ ކަމަކަށް ވެގެންދެއެވެ.ހަމަ އެހެންމެ ރިޔާސީ އިންތިޙާބުތައް ކައިރިވާ ވަރަކަށް އިސްމަޤާމު ތަކަށް ވާދަކުރައްވާ ބޭފުޅުންކުރައްވާ ވަޢުދުތައް ދާނީ ގިނަވަމުންނެވެ.މިވެނި މަޤާމަކަށް ހޮވުމުންއެވެނިމިވެނި ކަންތައްތަކެއް ކޮށްދިނުމަށް ވަޢުދުތަކައި އަހުދުތައް ކުރާނެއެވެ.އެ މަޤާމަކަށް ނުހޮވެނީސް އުޑުން ތަރިވެސް ބާލަދޭނެ އެވެ.ނަމަވެސް އެ މަޤާމު ތަކަށް ހޮވުމުން ވެގެންދާ ގޮތަކީ ކަދުރު ރުކަށް އެރި މިހާގެ ނަދުރަށްވީ ފަދަ ގޮތެވެ. އެހެނަސް މިއީ ކަންތައްތައް ވާންޖެހޭނެ ގޮތެއްނޫނެވެ.ޤައުމީ ލީޑަރުންނަކީ  ބުނާ ބަހުންނާޢި ކުރާޢަމަލުތަކުން ތެދުވެރި ބަޔަކަށް ވާންޖެހޭ ބައެކެވެ.ނުނީ ރައްޔިތުންގެ ކުރިމަތީ އެއީ  އެއްވެސް އަގެއްހުރި ބަޔަކަށް ނުވާނެއެވެ.

ތެދުވެރިކަމުގެ އިތުރުން ސުލްޙަ މަސަލަސްކަން ދެމެހެއްޓުމަކީ ޤައުމީ ލީޑަރުންގެ ކިބައިން ފެންނަށްޖެހޭ ރިވެތި ސިފަތަކުގެ ތެރެއިން އަނެއްސިފައެވެ. އެއްބައިވަންތަކަން ގެއްލޭފަދަ އެންމެހާ ކަންތައްތައް ޤައުމުގައި ކުރިއަށް ގެންދިޔަ ނުދިނުމަށް ޤައުމުގެ ލީޑަރުން ސަމާލުކަން ދޭންޖެހޭނެއެވެ. އެއްބަޔަކު އަނެއްބަޔަކާ އަރާރުންވެ، ހަސަދަވެރިކަން ފެތުރިގެންދާފަދަ ކަންތައްތަކުން އެބޭފުޅުން ދުރުވެގަންނަށް ޖެހޭނެއެވެ. އަދި ޤައުމުގެ އެއްބަޔަކު އެނެއްބަޔަކާ ގުޅިގެން މަސައްކަތް ކުރުމަށް ޤައުމުގެ ލީޑަރުން ހިތްވަރު ދޭންޖެހޭނެއެވެ. އެގޮތުން އެއބައިވަންތަކަމުގެ ދުވަހެއް ފާހަގަ ކުރެވިދާނެއެވެ. ޤައުމުގެސުލްޙަ މަސަލަސްކަން ދަމަހައްޓަން ޤައުމީ ލީޑަރުންނަށް ނޭނގިއްޖެނމަ ނުވަތަ އެކަމަށްސަމާލުކަން ނުދެވިއްޖެނަމަ ޤައުމު ބައިބައިވެގެން ދާކަށް މާގިނަ ދުވަހެއް ނުނަގާނެއެވެ.ނަތީޖާއަކަށް ވެގެންދާނީ އެފަދަ ލީޑަރުންނަކީ އެއްވެސް ރިވެތި ސިފައެއްނެތް ބައެއްގެ ގޮތުގައި ދުނިޔޭގެ އެންމެން ޤަބޫލުކުރުމެވެ.

ސުލްޙަ މަސަލަސްކަން ދެމެހެއްޓުމާއެކު އެހީތެރިކަމަކީ ޤައުމީ ލީޑަރުންގެ ކިބައިގާ ހުންނަށްޖެހޭ ރިވެތި ސިފަތަކުގެތެރެއިން ސިފައެކެވެ. އެހީތެރިކަމަކީ ވަރަށް ރިވެތި އަދި އެހާމެ މާތް ސިފައެކެވެ.އެހީތެރިކަން ފޯރުކޮށްދިނުމަށްޓަކައި ޤައުމުގެ ލީޑަރުންނަކީ އެޤައުމުގެ ޙާލަތު ރަނގަޅަށް ދަންނަބަޔަކަށް ވާންޖެހެއެވެ. ޤައުމުގެ ލީޑަރުން ޤައުމުގައި އެކިފަންތީގެ މީހުން އުޅޭކަން ދަނެގެން ރައްޔިތުންގެ ޟަރޫރީ ބޭނުންތައް ފުއްދޭނެފަދަ އިންތިޒާމުތަކެއް ހަމަޖައްސައިދޭންޖެހޭނެއެވެ.ކޮންމެ މީހަކަށްވެސް ދިރިހުރުމަށްޓަކާ އެހެން މިޙެއްގެ އެހީތެރިކަން ފޯރުކޮށްދޭން ޖެހޭނެއެވެ. އެގޮތުން ހިލޭ ބޭސްފަރުވާ ކުރެވޭނެ ގޮތާއި އެކަނިވެރި މައިންނަށް ކޮންމެވެސް އިނާޔަތެއް ދިނުންފަދަ ކަންތައްތައްވެސް ކުރެވިދާނެއެވެ.

އެހީތެރިކަމުގެ އިތުރުން ދީނަށް ހުރުމަތްތެރިކޮށް ހިތުމަކީޤައުމީ ލީޑަރުން ވަރަށް ބޮޑަށް އިސްކަންދޭންޖެހޭނެ، ވަރަށް މުހިއްމު އަދި އެހާމެ ރިވެތި ސިފައެކެވެ. ޤައުމީ ލީޑަރުންނަކީ ދީނީ ކަންތައްތައް ކުރިއަށްގެންދާ އެންމެ އިސްމީހުންނަށް ވާންޖެހޭނެއެވެ.އަދި ހަމަ އެހެންމެ ދީނަށް ފުރައްސާރަކޮށް،ދީނާ ޚިލާފު ޢަމަލުތައް ކުރުމުން ދުރުހެލިވާން ޖެހޭނެއެވެ.މިސާލަކަށް ދިވެހިރާޢްޖެ ފަދަ ސައްތައިން ސައްތަ މުސްލިމު ޤައުމެއްގެ ލީޑަރަކު، ރާބޮއި، ﷲ ފިޔަވާ އެހެން ފަރާތްތަކަށް އަޅުކަންކޮށް، ދިވެހިރާޢްޖެއަށް އެހެން ދީންތައް ތަޢާރަފު ކުރަން މަސައްކަތްކޮށް، މާތް އިސްލާމް ދީނަށް މަލާމާތް ކޮށްފިއްޔާ، އެއީ އެއްވެސް ރިވެތި ސިފައެއް ލިބިގެންވާ މީހެއްކަމަކަށް ރައްޔިތުންނެއް ނުދެކޭނެއެވެ. އެހެން ކަމުން ޤައުމީ ލީޑަރުންގެ ކިބައިން ދީނަށް ހުރުމަތްތެރިކޮށް ރިވެތި ސިފަ ފެންނަށް ޖެހެއެވެ.

ރިވެތި ސިފަތައް ލިބިގެންވާ ލީޑަރެއްގެ ކިބައިން ތެދުވެރިކަމާއި، ސުލްޙަ މަސަލަސްކަންދެމެހެއްޓުމާއި އެހީތެރިވުން އަދި ދީނަށް ހުރުމަތްތެރިކޮށް ހިތުން ފެނިގެން ދާނެއެވެ.އެފަދަ ބޭފުޅަކާސް ޤައުމު ކުރިއަރުވާ ރަނގަޅު ގޮތުގެ މަތީ ކާމިޔާބީތައް ހޯދޭނެއެވެ. އެހެންކަމުން ކޮންމެ ޤައުމެއްގެ ޤައުމީ ލީޑަރުންނަކީ އެފަދަ ބަޔަކަށް ވަމާތޯއެވެ.ޤައުމުގެ ތަރައްޤީ އާއި ،ކުރިއެރުމާއި ،އަދި އެއްބައިވަންތަ ކަމަށްޓަކައެވެ.