ރަށު ކައުންސިލްގެ ރައީސްކަން ލިބިއްޖެނަމަ

ކޮންމެ ރަށެއްގައިވެސް ކައުސިލަރުންނަކީ، ކުޅަދާނަ، ކެރޭ ހިންގުންތެރިންނަށް ވެއްޖެއްޔާ އެރަށެއް ކުރިއަރާ ދާނެކަމާމެދަކު އެއްވެސް ޝައްކެއްނެތެވެ. ހަމަ ޔަޤީނުންވެސް އަޅުގަނޑަށް ރަށު ކައުންސިލްގެ ރައީސްކަން ލިބިއްޖެނަމަ އަޅުގަނޑަކީ، ކެރޭ ހީވާގި ހިންގުންތެރިއެއްކަން ސާބިތުކޮށްދޭނަމެވެ. އެފަދަ ދުވަހެއް ފެނިއްޖެނަމަ، އަޅުގަނޑު އެންމެ އިސްކަމެއްދީގެން ކުރާނެ ކަންތައްތަކަކީ ޒުވާނުންގެ އަޚުލާޤީ ފެންވަރު ރަނގަޅު ކުރުމަށް މަސައްކަތް ކުރުމާއި، ދަނޑުވެރިކަން ފުޅާކުރުމާއި، ރަށުގައި ފެންވަރު ރަނގަޅު ބަނދަރެއް އެޅުމުގެ އިތުރުން މަސައްކަތްތެރިކަމުގެ ކޯސްތައް ހިންގުމެވެ.

ރަށު ކައުންސިލްގެ ރައީސްކަން ލިބިއްޖެނަމަ، އެންމެ އިސްކަމެއްދޭނެ އެއްކަމަކީ ރަށުގެ ރައްޔިތުން، ޚާއްޞަކޮށް ޒުވާނުންގެ އަޚުލާޤީ ފެންވަރު ރަނގަޅު ކުރުމަށެވެ. އެގޮތުން އެކިއެކި ދަރުސްތަކާއި ދީނީ ޕްރޮގްރާމުތައް ރަށުގައި ހިންގައިދޭނަމެވެ. އެއީ އެކި އުމުރުފުރާތައް ޝާމިލުވާނޭހެނެވެ. އަދި ކުށްކުރާ މީހުންނަށް އެކަމާގުޅޭގޮތުން އަދަބުވެސްދޭނަމެވެ. ސަބަބަކީ އަޅުގަނޑު ދެކޭ ގޮތުގައި ބަޔަކު ނުބައި ކަމެއް ކުރުމުން އަޅާނުލައި ދޫކޮށްލައިފިނަމަ އެކަމެއްދާނީ ތަކުރާރުވަމުންނެވެ. އެކަށީގެންވާ އަދަބު ލިބުމުން ކުރެވުނު ކުށުގެ އިހުސާސް ކޮންމެ މީހަކަށްވެސް ކުރެވޭނެއެވެ. އޭރުން އަޅުގަނޑުގެ ނަޒަރުގައި، ރަށުގައި ހިނގާ މާރާމާރީތަކާއި، ފޭރުމާއި، ވައްކަންފަދަ މައްސަލަތައްނުހުއްޓުނު ކަމުގައި ވިއަސް ޖުމުލަ ގޮތެއްގައި މަދުވާނެއެވެ. އަދިއަޚުލާޤަކީ މިއަދުގެ މުޖުތަމައަށް ބޭނުންވެފައިވާ އެންމެ އަގުބޮޑު އެއްރައުސްމާލު ކަމަށް އަޅުގަނޑަށް ޤަބޫލުކުރެވެއެވެ.

އަޅުގަނޑުމެންގެ، ދުވަސްވެފައިވާ މަސައްކަތެއްކަމުގައިވާ ދަނޑުވެރިކަން މިވަނީ ވަރަށް ދަށަށް ގޮސްފައެވެ. ދަނޑުވެރިންގެ ޝަކުވާއަކަށްވެފައިވަނީ ދަނޑުވެރިކަމަށް ބޭނުންވާ ސާމާނުތައް ނުލިބުމުން، ދަނޑުވެރިކަނ ފުޅާނުކުރެވޭކަމެވެ. އެހެންކަމުން ދެވަނައަށް އެންމެ މުހިއްމު ކަމަކަށް ދެކޭނީ ދަނޑުވެރިކަން ފުޅާކުރުމެވެ. އެގޮތުން ދަނޑުވެރިން ދަނޑުވެރިކަން ކުރަން ރަށުގެ ވަކި ސަރަހައްދެއް (ބިމެއް) ކަނޑައަޅާ ދޭނަމެވެ. އަދި ދަނޑުވެރިންނަށް "ސަބްސިޑީ" ދިނުމުގެ އިތުރުން، ދަނޑުވެރިކަމަށް ބޭނުންވާނެ ބޭހާއި، ފާޓިލައިޒަރ އަދި ބޭސްޖަހަން ބޭނުންވާނެ ސާމާނު ހޯދައި ދޭނަމެވެ. ދަނޑުވެރިކަން ރަނގަޅު ކުރެވިއްޖެނަމަ ރަށުގެ ރައްޔިތުންނަކީ ފުދުންތެރި ބަޔަކަށް ވެގެންދާނެއެވެ.

އަޅުގަނޑުމެންގެ ރަށަކީ އަރާބޭބުމުގެ ފުރިހަމަ ނިޒާމެއް ލިބިފައިނެތް ރަށެކެވެ. އެކަމުގެ ސަބަބުން ވަރަށް ގިނަ ދަތިތަކާ ކުރިމަތިލާން ޖެހިދެއެވެ. މާލެ ދަތުރުކުރާ އޮޑި ދޯނި ފަހަރަށް ހިކި ދިޔާގައި ފަޅުތެރެއަކަށް ނުވަދެވެއެވެ. އެހެން ކަމުންބައެއްފަހަރު އެތަކެއް އިރެއްވާންދެންވެސް ބޭރުގައި މަޑޫކުރަން ޖެހިދެއެވެ. މި މައްސަލަތަކަށް ހައްލެއް ހޯދައި ދިނުމަށްޓަކައި އަޅުގަނޑު ރަށުގައި ފެންވަރު ރަނގަޅު ބަނދަރެއް އަޅައިދިނުމަށްޓަކައި ގަދައަޅާ މަސައްކަތް ކޮށްދޭނަމެވެ. އޭރުން ބޮޑެތި އުޅަނދުފަހަރުތަކަށްވެސް ވަކި ގަޑިއަކަށް އިންތިޒާރުކުރަން ނުޖެހި ބޭނުން ގަޑިއަކު ބަނދަރުކޮށްލެވޭނެއެވެ.

އަޅުގަނޑަށް ރަށު ކައުންސިލްގެ ރައީސްކަން ލިބިއްޖެނަމަ،ރަށުގައި މަސައްކަތްތެރިކަމުގެ ކޯސްތައް ހިންގައިދޭނަމެވެ. އެގޮތުން، އަންހެން ބޭފުޅުންނަށް ޚާއްޞަކޮށްގެން ފަހާކޯސް، ކޭކު ޑެކަރޭޝަން ކޯސްފަދަ ކޯސްތައް ހިންގައިދޭނަމެވެ. އަދި ހަމައެހެންމެ ފިރިހެން ބޭފުޅުންނަށް ޚާއްޞަ ކޮށްގެން ލިޔެލާޖެހުމާއި، އެފަދަ އެކިއެކި އަތްތެރި މަސައްކަތުގެ ކޯސްތައް ހިންގައި ދޭނަމެވެ. އޭރުން ވަޒީފާ އަދާކުރުމަށް ބޭރަށް ނުދެވޭ މީހުންނަށްވެސް ގޭގައި ތިބެގެން އާއްމުދަނީ ހޯދުމުގެ މަގު ފަހިވެގެން ދާނެއެވެ. އަދި ކުރާނެ ކަމެއްނެތިގެން ބޭރުތެރޭ ހަޔަށް މަޔަށް އުޅޭ މީހުންގެ ލިސްޓްވެސް ކުޑަވެގެން ދާނެއެވެ.

ރަށު ކައުންސިލްގެ ރައީސްކަން އަޅުގަނޑަށް ލިބިއްޖެނަމަ ހަމަ ޔަޤީނުންވެސް އަޅުގަނޑުމެންގެ ރަށަކީ ކުރިއަރާދާނެ ރަށެކެވެ. އެއީ ޒުވާނުންގެ އަޚުލާޤް ރަނގަޅުވެ، ދަނޑުވެރިކަން ފުޅާވެ، ފެންވަރުގެ ބަނދަރެއް އޮވެ އަދި ހަމައެހެންމެ އެރަށޭއްގެ ބަޔަކީ މަސައްކަތް ރަނގަޅަސް ދަންނަ ބަޔަކަށް ވުމުން އެރަށެއް ކުރިއަރައިދާނެތީއެވެ. ހަމަ ޔަޤީނުންވެސް އަޅުގަނޑު އަބަދުވެސް މަސައްކަތްކުރާނީ އަޅުގަނޑުގެ ރަށް ކުރިއަރުވާ ތަރައްޤީ ކުރާށެވެ.