ޝިފާއެއް ނުލިބުނު ބަލި

ގަމަރިއްޔާއަކީ ޒަވާޖީ ޙަޔާތެއް ފަށައިގެން ދުވަސްތައް ވޭތުކުރަމުން އަންނަ ހީވާގި އަންހެނެކެވެ. އެހެނަސް ކައިވެނީގެ ފަހުން އޭނާގެ ހަށިގަނޑަށް ބޮޑެތި ބަދަލުތަކެއް އަންނަމުންދާކަން އޭނާއަށް ފާހަގަ ކުރެވެއެވެ. މުޅިމީހާގެ ގައިގާ ލޮކިމަސްޖަހާ ހެލިފެލިވެ އުޅުމަށް ދަތިވާންފަށައިފިއެވެ.

ކުރިން ލޯބިން އޭނާގެ ފިރިމީހާ "ގަމިއްކޮ"ގެ ނަމުން މުހާތަބު ކުރިނަމަވެސް މިހާރު އޭނާވެސް ގޮވާލާ އުޅެނީ "މަޑުޗަކުން ޗައްޕާސް"ގެ ނަމުންނެވެ. މިކަމަށްވުރެ ހާސްކަން އިހްސާސްކުރަން އޭނާއަށް ޖެހުނީ ހަށިގަނޑުގައި މިހާރަކަށް އައިސް އަޅަމުންދާ ވޭނެއްގެ ސަބަބުންނެވެ. ހިނގާ ބިނގާވެ އުޅެން ދަތިވާވަރަށް ރިއްސައެވެ.

މިކަންތައްގަނޑު ފިރިމީހާޔާވެސް ހިއްސާނުކޮށް ގަމަރިއްޔާ ވިސްނަމުން އެދަނީ އެކަމަށް ހޯދާނެ ފަރުވާއަކާމެދުގައެވެ. ކޮންމެއަކަސް ފޯނުނަގައި އައި.ޖީ.އެމް.އެޗް.ގައި އިންނަވާ ޑޮކްޓަރ ގަމާރުތުންގާއަށް ދެއްކުމަށްޓަކައި އެދުވަހުގެ ހަވީރަށް އެޕޮއިންޓުމެންޓެއް ހަމަޖައްސައިފިއެވެ. ގަމަރިއްޔާ ހަވީރުގެ ފިންޏަށް ފިނިބުރުޖަހާލަން ނުކުންނަފަދައިން ޑޮކްޓަރަށް ދައްކަން ތައްޔާރުވެގެން ގެއިން މިސްރާބު އެޖެހީ ހޮސްޕިޓަލާދިމާއަށެވެ. އިސާހިތަކު ހޮސްޕިޓަލަށް ދެވިއްޖެއެވެ. އަރައިގެން ހުރީ ވަރަށް އުސް ކައްޓެއްހުރި ފައިވާނަކަށް ކަމުން އެންމެންގަނޑުތެރޭން އަވަސްއަވަހަށް ދާންއުޅުމުގެ ތެރޭގައި އޭނާ ކައްސާލައިގެން ވެއްޓިއްޖެއެވެ. ގަތްލަދުން އަވަސްއަވަހަށް ތެދުވެވުމާއެކު ގަމަރިއްޔާގެ ކަންފަތުގައި ޖެހުނީ އޭނާގެ ނަންބަރަށް ގޮވާލިއަޑެވެ.

ގަމަރިއްޔާ އަވަސްއަވަހަށް އެތެރެއަށްވަދެ އިށީއިނުމާއެކު ޑޮކްޓަރ ސުވާލު ކުރަން ފަށައިފިއެވެ. އެންމެ ފުރަތަމަވެސް ފެން އާދޭތޯ ޑޮކްޓަރ އެއްސެވިއެވެ. ގަމަރިއްޔާ ޖަވާބުގައި އާނއެކޭ ބުންޏެވެ. ދެންވެސް ޑޮކްޓަރ ފަހަރަކު ސުވާލެއް ކުރައްވަމުން ގެންދެވިއެވެ. ދޮސް އާދޭހޭ އެހުމުން ގަމަރިއްޔާ ބުނީ ބައެއްފަހަރު ހުދުކުލައިގައި އަދި އަނެއްބައިފަހަރު ރީނދޫ ކުލާގައާއި، ފެހިކުލައިގައިވެސް ހުންނަކަމަށެވެ. މިހާހިސާބުން ޑޮކްޓަރަށް ވިސްނުނީ އޭނާގެ ހާލަތު ވަރަށް ގޯސް ވެފައި ވާކަމަށެވެ. އެހެން ކަމުން ޑޮކްޓަރ ބޭނުންވީ ބަލާލުމަށެވެ. ގަމަރިއްޔާކުރެ އަހާލުމުން އޭނާ ވަރަށް ބޮޑަށް ހާސްވެ ލަދުގަންނަ ގޮތް ވެއްޖެއެވެ. އެހެންނަމަވެސް ލަދަކާ ހުރެ ތަދެއް ނުފިލާނެކަން އެނގޭތީ އެކަމަށް އޭނާ އެއްބަސްވިއެވެ. ޑޮކްޓަރ ގަމަރިއްޔާގެ ގާތަށް ކުޑަކޮށް ޖެހިލާ ފުރަތަމަވެސް ލޯބަލާލިއެއެވެ. ގަމަރިއްޔާ ހައިރާންވެ އަންތަރީސް ވިއެވެ.

އެންމެ ފަހުން ނީނދެވިގެން ގަމަރިއްޔާ ބުނެލިއެވެ. "ޔޫރޮނޮލޮޖިސްޓުން ބައްލަވަނީ ލޯ ހެއްޔެވެ؟ އަދި އަޅުގަނޑު ހީކުރީ.... "އެހެންވެ ވަރަށް ލަދުން ހުރެ އައީވެސް" ގަމަރިއްޔާ އިބާރާތުން ޑޮކްޓަރަށާއި ބަސްދޭހަ ކުރާ ކުއްޖާގެ ހިނި ފަޅައިގެން ދިޔައެވެ. ކަންވީގޮތް ބެލިއިރު އަވަސްއަރުވައިލައިގެން ގަމަރިއްޔާއަށް މި ވަދެވުނީ ނުބައި ކޮޓަރިއަކަށެވެ. އޭނާ އެޕޮއިންޓުމެންޓް ހެއްދީ ޔޫރިނޮލޮޖިސްޓަކަށެވެ. ނަމަވެސް ވަދެވުނީ ލޮލުގެ ހާއްސަ ޑޮކްޓަރ އިންނަވާ ކޮޓަރިއަށެވެ.