އުފާވެރި މަންމައަކަށް ވާށެވެ!

މަންމައެއްކަމުގައި ވުމީ އުފަލުން ފުރޭފަދަ ރަޙުމަތެއް،

      ދަންނަވަންތޯއޭ އެއީ ނުލިބޭނެފަދަ މޮޅު ނިޢުމަތެއް.

ކުޅިވަރެއް މަޖަލެއްމެއޭ މުނިފޫހި ފިލުމެއް އެކުލެވޭ،

      މުޅިދުވާލާ ރޭގަނޑަށް ކެނޑިނޭޅި ލިބިދޭ ރާހަތެއް.

ދަރިފުޅުގެ ޅަޅަ، ތުއްތު އަނގައިން އޮހޮރެމުންދާ ބަސްތަކުން،

      ވެރިވަމުންދާނީ ހިތަށް މިންވަރު ނުކުރެވޭ ލައްޒަތެއް.

މަދަރުސާއަށް ދާ ދުވަސްއައުމުން އެ ކުޑަ ފުކު ދާހިތުން،

      އެދުވަހުން ލިބޭނީ ހިތަށް އުފަލުގެ މުޅިންއާ ބާވަތެއް.

ކުރިއަރާނަމަ ދަރިފުޅެއް ޢިލްމީ، ރިޔާޒީ ރޭހުގައި،

      ހުރި ނަސީބުގެ ބޮޑުކަމޭ! އަސްތާ އެއީ ބޮޑު ޢިއްޒަތެއް.

=އަބްދުﷲ ޞާދިޤު=

ޝަރަހަ:
 މަންމައެއްކަމުގައި ވުމީ އުފަލުން ފުރޭފަދަ ރަހުމަތެކެވެ. އަދި ނުލިބޭނެފަދަ މޮޅު ނިޢުމަތެކެވެ. އަދިހަމައެހެންމެ، އެއީ މުނިފޫހި ފިލުމެއް އެކުލެވޭ މަޖާ ކުޅިވަރެއްވެސްމެއެވެ. މަންމައަކަށްވުމީ މުޅި ދުވާލާއި ރޭގަނޑަށް ކެނޑިނޭޅި ލިބިދޭ ރާހަތެކެވެ. ދަރިފުޅުގެ ޅަޅަ ތުއްތު އަނގައިން އޮހޮރެމުންދާ ބަސްތަކުން މަންމަގެ ހިތަށް ވެރިވަމުންދާނީ މިންވަރު ނުކުރެވޭ ލައްޒަތެކެވެ. މަދަރުސާއަށްދާ ދުވަސްއައުމުން އެކުޑަ ފުކު ދާހިތުން އުޅޭއިރަށް ހިތަށް ލިބޭނީ އުފަލުގެ މުޅިންއާ ބާވަތެކެވެ. ދަރިފުޅު ޢިލްމީ ގޮތުން ކުރިއަރާ ދާނަމަ އެއީ މަންމައަށް ހުރި ބޮޑު ނަސީބެކެވެ. އަދި ބޮޑު ޢިއްޒަތެއްމެއެވެ.

ޅެންވެރިޔާ ވިދާޅުވަނީ ވަރަށްވެސް ބޮޑު ތެދުފުޅެކެވެ. މަންމައަކަށް ވުމަށްވުރެ ބޮޑު ނިޢުމަތެއް އެއްވެސް އަންހެނަކަށް މި ދުނިޔެ މައްޗަކު ނުލިބޭނެއެވެ. ދަރިފުޅުކުރާ ކޮންމެކަމަކަށްވެސް އެންމެ އިސްކަމަކާއި ޝައުގުވެރިކަމެއް ދޭނީ މަންމައެވެ. ދަރިފުޅުގެ ކޮންމެ އުފަލެއްގަޔާއި ހިތާމައެއްގައިވެސް އެންމެ ގާތުން ބައިވެރިވާނީ މަންމައެވެ. އެއީ މަންމަގެ ހިތުގައި އޮންނަ ލޯތްބެއްގެ ބޮޑުކަމުންނެވެ. އެހެންމީހެއްގެ ދުލުން އެމީހެއްގެ ދަރިއެއްގެ ރަނގަޅު ވާހަކަ ދައްކާނަމަ އެ މަންމައަކު ވަރަށް އުފާވާނެއެވެ. އަދި އެންމެ އުފާވާނީ ތިމާގެ ދަރިފުޅަކީ އަޙްލާގު ރަނގަޅުވެފައި ޢިލްމީގޮތުން ކުރިއަރައިދާ ކުއްޖަކަށް ވެއްޖެއްޔާއެވެ. މިސާލަކަށް ދުނިޔޭގެ ފެންވަރުގެ މަތީ ވަނައެއް ތިމާގެ ދަރިއަކަށް ލިބޭދުވަހު އެމަންމައެއް ވަރަށް އުފާވާނެއެވެ. އެއީ އެ މަންމައަކަށް ލިބޭނެ ބޮޑު ޢިއްޒަތެއްވެސްމެއެވެ.